{ و لسوف يعطيك ربك فترضى } , أُعطيت أكثر مما استحق 💪🏻❤️و لم أُردُّ خائبا
قد سقاني خالق العرشِ ما يروي ظمآن القلبِ !
من فرحٍ قد كساهُ دمع عينايْ بذهول بهذا القول
(( و الله و قدَّرنا عليكم يا قياس 😂❤️)) .
آخر ٤ شهور في المرحله الثانويه كنت أردد ' ضميري ميت ' + ' ضميري يحتاج CPR ' كنت عايشه في جو من التوتر و الخوف الغير باعث على السعي و التحدي !
ليه؟؟؟
لكثرة الكلام عن صعوبة التحصيلي و صعوبة انك تجيب +٩٠ و تحصيلي و تحصيلي ... و نسب القبول 🔥.
⚫️ بدايةً وشو التحصيلي ؟
هو إختبار لقياس حصيلتك العلميه للمرحله الثانويه ، بالمختصر وش درست في آخر ٣ سنوات دراسيه في ٤ مناهج علميه هي ( الأحياء / علم البيئه + الكيمياء+ الفيزياء+ الرياضيات) ، الاختبار مقسم إلى ٤ فصول كل فصل يجيب لك مكس أسئله لهذي المواد علماً إن الأسئله يُقال إنها موزعه بالتساوي (( ليه قلت يُقال 😂 لأني لما اختبرت حسيت أكثر الاسئله أحياء و فيزياء لكن مدري شالوضع بالضبط )) كل منهج يجي منه ٢٥ سؤال هذي الأسئله تكون ٢٠٪ من أول ثانوي ،٣٠٪ من ثاني ثانوي،٥٠٪ من ثالث ثانوي👌🏻 >>> بمعنى ركز على ثالث و استغل وقتك الحالي بالمذاكره الجديه " طبعاً إختبار التحصيلي مطلب أساسي للقبول الجامعي و لك فرصتين للإختبار الفرصه الأولى تقريباً في منتصف ثالث ثانوي و الثانيه بعد الإختبارات النهائيه لثالث ثانوي و اذا شديت الهمه ما يحتاج تختبر الثاني ❤️ .
🔘 نجي لتجربتي الخطيره مع التحصيلي 🌚:
كنت أحط خطط للمذاكره و أفكر يومياً في التحصيلي ! لكن بدون مذاكره' كنت في حالة توتر مريبه لدرجة صرت شبه معزوله عن العالم 😂 = نفسيه ! ' لدرجة مره من المرات صحتني أمي لصلاة الفجر 😂🌚 جلست أتمتم بالكيمياء العضويه مثيل ايثيل... و استمرت الاوضاع بهذا المنوال " فجأه بدأت أصحى ، فلآانه تبين الشيء ؟ ماراح يجيك كذا، لازم تشوفين حل و تذاكرين ' بداية الشهر الاول تقريباً انضميت لإحدى قروبات التحصيلي (( كان قروب يضم عدد كبير من الطلاب و الطالبات من مختلف مناطق المملكه من هم في المرحله الثانويه)) صراحةً كنت أطقطق هناك 😂❤️" بمعنى ما اسكت لزوم انط في كل سؤال في كل فقره اتفلسف أحاول أحله ... الجميل في القروب هو انضمام بعض الأساتذه لتوضيح بعض المواد كالرياضيات و الفيزياء و الكيمياء ، طبعاً مدير القروب هو طالب في عمرنا (( اسمه عبدالكريم 👌 أهنيه صراحةً لإمكانية إدارته للقروب و تحمله تصرفات البعض و ضبط القروب 🌚 ، أحياناً القروب يصير مزعج أكثر من كونه مفيد 🚶 القروب كان يضم مراحل الثانوي كلها لكن مع اقتراب الاختبار من هم في ٢ و ١ ثانوي اطلعوا ما تحملوا الضغط😂💔 ما علينا، من هذا القروب انبثق قروب النخبه ❤️' و هو قروب مصغر يضم تقريباً فقط دفارة القروب الكبير 👽 كنا نجمع فيه المهم/ بعض الملخصات إلي كنا نكتبها/ نرسل أسئله/ أفكار للحل الزبده كان جدًا جميل و الأعضاء جد إن البعض منهم يرفع ضغطك ٢٠٠😁 إلا إنه كان جدًا مفيد " طبعاً كان وقتها فيه قروب لمنال العلم قياس هو جيد لكن ما استمريت فيه فضلت اقتصر مع النخبه + قروب التحصيلي بقيادة عبدالكريم 👌 ' أحب أقول لكم كلا القروبين كان فيهم عينة عندها هوس دوفاري😩😂 ! يعني البعض كان يطلع شهر من القروب عشان يذاكر أو البعض يقول لك أنا صار لي شهرين آذاكر و يجيك طالب كذا يشطح لك أنا ختمت مناهج أول و ثاني و بدأت في مناهج ثالث و يبدأ يرسل لك أشياء غريبه ما تعرف تحلها و أنت مسكين يَ بعدي تعيش لحظة الجلطة ! لكن بكل بساطه أساساً أنت تو ما بعد تدرسها 😂 >>> ما عليكم أبدًا من هذي العينة أنا كانت تجيب لي نوبات قلق منهم😂لكن بدون فائدة !!! لأني أخاف و أعيش جو الوهم و لا أذاكر ، * لا أحد يصير مثلي* ، أتذكر مره من المرات كان عندنا أستاذ مصري في يومها كان يشرح فصل من الرياضيات تقريباً الاشتقاق و التفاضل و أشوف البعض يحل و متحمس ☺️ و أنا كنت فاهمه جزئيه بسيطه جدًا منه (( أستاذتي اشرحت لنا أشياء بسيطه منه عشان تهيئنا للتحصيلي في بداية الفصل الثاني، علماً ان هو من الفصول الأخيره في كتاب الرياضيات ٦ )) الزبده إني ما عرفت أحل شيء🌚😂 و دخلت في حالة خوف و قمت أكلم نفسي و أهوجس ! كيف كذا ليه مو عارفه أفهم و لا أحل ،فلانه إلي كان يجيب الدرجات الكامله في أول و ثاني ثانوي مستحيل ربي يضيع تعبه و مذاكرته بمعنى كل إلي ذاكرتيه راح يرجع لك !!! لكن هي مسألة وقت و إيمان داخلي بقدراتك 💃🏿، المهم صار فيه حوار طويل مع نفسي بحضور مجموعة كتب ثانوي كلها 🙊 *مازال عندي مقطع الحوار ودي تسمعونه 😂 لكن ما انصحكم* ، في وقتها كان في شخصيه اعتبرها قدر من رب العباد إنها تساعدني و أساعدها في التحصيلي اطلعت في حياتي من دون سابق انذار👤!!! نتحفظ على على اسمها و راح نعطيها مسمى من عندي و ليكن * Co-Goal *.
Co-Goal في يومها لخصت لي مبادئ الاشتقاق و كانت تعطيني دافع اني اذاكر و تشجعني > كان شيء متبادل تقريباً كنا نناقش بعض الاسئله مع بعض و نشرح لبعض ... جد Co-Goal أحياناً كانت مزعجه و أتهاوش معها 😂😩 لكن كنا محتملين بعض بمعنى كنا نسعى لهدف واحد و هو ٩٥+ 🌚❤️ و كلانا حقق هذا الشيء بفضل الله و دعوات الوالدين .
كيف كانت مذاكرتي ؟
كالمعتاد حطيت خطه ، و لا نفذت منها شيء و انضمامي للقرووب غير كافي 😐!!! قرب الاختبار باقي عليه تقريباً ٣ أسابيع '
هل معقوله تكفي؟ أكيد تكفي ! كيف ؟
دراستك في أول و ثاني ثانوي و الفصل الدراسي الاول من ثالث ثانوي توهمك انك ناسي كل شيء ' لكن واقعياً هي ما تبخرت لأنك بكل بساطه لو مذاكرها صح و بذمه و ضمير بترجع لك لكن تحتاج مراجعه سريعه ، أنا كنت أشارك في المسابقات المنهجيه و هذا نفعني كثيير مثلاً شاركت في أولمبياد الكيمياء و استعديت له استعداد بسيط لكن طلعت بفائدة كبيره لدرجة إن في يوم اختباري التحصيلي و في مقر الاختبار قررت افتح إحدى ملازم الكيمياء😂❤️✋ من زود الثقه > الموضوع ليس بغرور لكن كان وضعي مع الكيمياء جدًا بسيط لأنه كان مادتي المفضله و غيرها من المسابقات گ كأس التميز العلمي .
⚫️ طرق مذاكرتي كانت كالتالي :
* أنا من النوع إلي لزوم يلتزم بشيء عشان ينفذ لذلك قررت على النهاية أدخل إحدى الدورات التدريبيه لكنها لحالها ما تكفي بالنسبه لطموحي عشان كذا عشت تجربة ضغط النفس الارادي ! كنت أدرس نظام مقررات و كان فيه ضغط نوعاً ما إختبارات و مطويات و مشاريع و دوامي إلى ١:٣٠ تقريباً فَ كنت ارجع البيت قرابة ٢ " كانت علاقتي مع الاكل سقيمه > فخلونا نحذفه من الوقت🌚" ارتاح ١٥-٣٠ دقيقه و بعدها أطلع اطلاع سريع على جدول المدرسه اذا فيه واجب او إختبار ابدأ فيه بعدها على الساعه ٤ تقريباً كان موعد الدورة فَ كان شيء أساسي كوب الكوفي معي😩 ! عشان أكون منتبها و لا أنام 😂 لأن كان فيه بنات في الدورة ينامون 🏃" كنت كل يوم أدرس مادتين مع نخبة من الأساتذه❤️😭" دوامي كان إلى ٨:٣٠ و على ما ارجع البيت تصير ٩ ' كان أستاذي يقترح علينا ننام و نصحى الفجر نراجع ما درسناه ' طبقت النصيحه بكل حب🌚✋ كنت ارجع و أنام و اصحى ٢ اراجع إلي درسته و أكمل مذاكرتي المدرسيه بعدها أصلي و أنام و من ثم أصحى للمدرسه و أكمل النومه في السياره😂 و هكذا ...
🔘 نجي نفصل الطرق المتبعه لكل ماده اضافةً لمنهجية الدورة:
* الرياضيات :
رجعت للكتب الدراسيه و تصفحتها لا تقولون صعبه و كيف برجع لـ ٦ كتب ... ! أنت كنت مذاكرها و مختبر فيها فَ الوضع سليم ، كنت افتح الدروس استرجع الفكره الاساسيه و أركز على شيء اتوقع الاغلب يسحب عليه (( فيه جزئية صغيرة نهاية كل درس اسمها تدرب على الاختبار هاذي ركزت عليها ❤️👌 لأن فيها أفكار مهمه و غير مباشره يعني فيها تلاعب بالعقل فَ حسيت إنها شبيها بالاختبار التحصيلي كنت اتفق مع Co-Goal و كنا نحلها و اذا بنتأكد كانت Co-Goal محمله كتاب المعلم 🌚👌))
*مادة الحُب " الكيمياء :
تقريباً ما اذكر اني رجعت للكتب لأنه كان الوضع ما يحتاج كان أستاذنا في القروب * أ.نبيل* ما يقصر أبدًا كان يشرح كل شيء برحابة صدر❤️' و أستاذ الدورة كان يشرح جزئيات الكيمياء من كتاب ناصر العبدالكريم " الكتاب هذاك الملون " فَ أعتبر الكيمياء من أسهل المواد 👌الخفيفه على القلب.
*الفيزياء :
هذي الماده 😒 تجيب النفسيه لي ما كنت أحبها كثير و ما كانت راكزة في مخي مره " فَ اعتمدت تقريباً ثلاثة أشياء :
- موقع قياس كان فيه١٠٠ مثال محلول و مشروح لأهم الأشياء في الفيزياء >> لزوم تدخلونه😍 خطير و البعض يغفل عنه (( هو فيه ١٠٠ مثال لكل المواد المطلوبه في التحصيلي لذا نصيحةً ادخلوا و أطلعوا عليها )) + كتاب العبدالكريم اذكر رجعت له و حليت منه هو مفيد نوعاً ما يعطيك أفكار لطريقة الاسئله.
- ملزمة أستاذي في الدورة كانت جدًا ممتازه , جد إن البعض كان يسحب عليه و على شرحه لكن ما حسيت بقيمته إلا لما ذاكرت ملزمته كانت رهيبه مره😭❤️، مدري كيف تتوفر 😅.
- كتاب ثالث ثانوي جدًا مهم و ركزوا على الكتاب ككل حتى الفصول الاخيره إلي من المحتمل تختبرون و لسى ما درستوها يجيبون منها كم سؤال لذا حرصوا على الأساتذه يعطونكم زبدة الفصول الاخيره و إن اضطر الامر عادي خذوا حصه إضافيه 🙏❤️ >>> لمصلحتكم و الله.
* الأحياء + علم البيئه :
أنا عن نفسي كانت أكثر ماده خايفه منها 😣 لأني ما درستها بشكل صحيح ! فَ كنت أحاتيها من قلب لذا اتبعت تقريباً ٣ طرق :
- فتحت كتاب علم البيئه / اذكر طقطقت على إختبار مقنن من كُتب الاحياء لكن ما إلتزمت كالعاده 😓.
- ملزمة أستاذي بالدورة كانت جدًا ممتازة و كانت عبارة عن تجميعات مقسمه على المراحل الثلاث ' اذكر الأستاذ كان يقول كل سنة لابد يجي منها لكن تختلف الطريقة بمعنى كان يكتب لنا ملاحظة ( تعريف/تعليل/تعداد>> انصح بهذي الطريقة و آنتم تذاكرون من التجميعات 👌🏻) عند كل خيار 😭❤️ " ربي يجزيه الجنة كان جدًا ممتاز.
- كتاب ثالث ثانوي جدًا ممتازه ذاكروه بذمه و ضمير حتى الفصول إلي ما وصلتوا لها اطلعوا عليها اذا تبون 95+ .
🔘 بطرح لكم بعض الأشياء الاضافيه المفيده ممكن تذاكرون منها :
١- حساب طموح للتحصيلي > كنت أطقطق هنا 😂😩 ' اعذروني شباب طموح أحياناً كنت ارفع ضغطكم ❤️ >>> معلومه شباب طموح كان بعضهم معنا بالقروب 🌚.
٢- حساب منال العلم قياس / قروب.
٣- التجميعات "بفهم و ليس حفظ يرحم والديكم"
٤- التسريبات 😍😁❤️ " لزوم تذاكرونها ، Co-Goal ارسلتها لي قبل الاختبار بأيام و حلينا بعضها و جاء كم سؤال تقريباً 👌.
٥- كتيب قياس " كتيب صغير يوزع غالباً بعد إختبار القدرات ٣ أو ٤ " فيه تقريباً ٢٠ سؤال جميلين 👌🏻 و يفيدون.
٦- مساعدة الغير ! هذي جدًا جدًا أقدر أقول هي سبب عُلو درجتي بعد توفيق الله كيف ذلك ؟ (( ليس مديحاً و لا غرور ! ، كنت أستقبل أسئله من الطلبه إلي معي بالقروب أو بالمدرسه و أشرحها لهم و أعلمهم طريقة الحل و أشارك معهم بعلومات آحسها مهمه ! ، أحياناً البعض يرسل لي أسئله مو عارف يحلها فَ اكتسب معرفه إضافيه منها ❤️" فسبحان ربي كل عمل الخير هذا عاد علي بالمنفعه الكبيره 😍)) .
٧- إذا عندك خلل في مادة الكيمياء أستاذ نبيل جدًا ممتازه و أنصح بالإلتحاق عنده 😍 , *بسعر رمزي* >> تفضلوا هذا رقمه +966 54 300 4020
🔘 نصائح ليوم الإختبار:
١- ادخل بثقه و توكل على الله و كُن مبتسم "
٢- لا تتوتر أبدًا و لا تخاف حاول تفلها مع أصحابك.
٣- كُل جالكسي / اشرب أشوية مويه قبل الإختبار < من نصائح Co-Goal 😂! جربوها ، "عن نفسي جربتها و نصحت كل إلي أعرفهم فيها 😂❤️" + حط علبة مويه جنبك أحياناً تخلص قبل الوقت و تكون فاضي و جسمك يحتاج مكافئه🌚❤️ و هذي أقل مكافئه متاحه في مثل هذا الوضع .
٤- نصيحه من قلب لأني عانيت 😞 " أهتموا بأكلكم و لا تفكرون تهملونه و قللوا من التفكير و القلق 💔 تفادياً للعواقب" كالأمراض .
٥- التجميعات للأيام السابقه " إلي قبل إختبارك بيوم او يومين" حاول تكون على إطلاع مستمر 👌🏻.
⚫️ أعيد و أكرر لازم تكون على يقين بقدراتك و لا تستهين فيها أبدًا و الثقة برب العباد رغم كل إلي يصير لك لابد تكون مترسخه في قلبك ، أقرب مثال حدث لي ليلة الاختبار فجأه عيوني احمرت و حسيت بألم شديد !!! وقت الاختبار اختفى الألم و الله😌 ، لكن لما طلعت من الاختبار في اليوم الثاني على طول المستشفى 💔🌚 " لذا الحمدلله على كل حال و حبيت أقولكم حاجه ما عليكم من كمية الأجانب إلي معكم بالقاعه و مدى تأثيرهم على درجاتكم و إلي يخربطون المتوسط و مدري أيش " ما عليكم منهم كنت أتحلطم لما طلعت من القاعه و شفت طالبات من مختلف الجنسية السعوديه😂💔 و ظلمتهم > آعتذر لكم يَ بعد حيي ❤️.
في الختام 'مهما حدث لك من ظروف و هموم لابد أن تدرك " كل ذلك مجرد ابتلاء من الله لك ! لسبب ما ❤️ و هو يتفاوت بمدى حسن ظنك بالله " و دائماً أحب استشهد بالحديث القدسي (أنا عند ظن عبدي بي ، إن ظن خيرًا فَله و إن ظن شرًا فَله) ! .
أنتمنى لكم من كل قلبي أعلى الدرجات💜 "
F.Jawad
حسابي بتويتر @foof520
اذا عندكم أي استفسار اطرحوه علي هنا 👇🏻و بحاول بقدر المستطاع ما أقصر معاكم🙊.
